Hvað er svona merkilegt við Retina skjá?

8. mars 2012 | Bjöggi | Senda á Facebook

Apple kynnti í gær nýjan iPad með Retina skjá og vakti það mikla lukku um heim allan. Eigendur iPhone 4 og 4S vita án efa hvað um er að ræða, en við skulum aðeins skoða hvað þetta í raun og veru þýðir.

Apple byrjaði að nota orðið Retina þegar það kynnti iPhone 4 og núna nýja iPad, skilgreiningin hjá Apple er að skjárinn er það skýr að nánast ómögulegt er að greina pixla á skjánum með berum augum – sem þýðir einfaldlega bestu mögulegu gæði fyrir hið mennska auga.

Augu okkar eru að sjálfsögðu mismunandi og Apple segir að miðað sé við að horft sé á tækið úr eðlilegri fjarlægð (þ.e. í fjarlægð sem okkur finnst í raun þægilegast að nota græjuna).

Til að fá betri skilning á útkomuna getum við borið þetta saman við t.d. MacBook Pro fartölvuna. Minnsta MacBook Pro hefur að geyma 1280 x 800 pixla á 13,3-tommu fleti. Það gerir 1.024.000 pixla.

Nýi iPad hefur hins vegar að geyma 2048 x 1536 pixla á 9,7-tommu fleti. Það gerir samtals 3.145.728 pixla, eða rúmlega þrefalt fleiri pixla en á MacBook Pro vélinni! (Til gamans má geta hefur 27″ iMac upplausnina 2560 x 1440, sem gerir 3.686.400 pixla en hún er líka 17,3-tommum stærri en iPad í skjástærð).

Þá er bara að ímynda sér hvernig öllum þessum pixlum er svo þjappað saman á minni flöt (9,7-tommur)!

Texti, ljósmyndir og vídeó í HD njóta sín virkilega vel á skjá sem þessum – skýrari mynd hefurðu að öllum líkindum aldrei séð með berum augum!

Tilhlökkunin er því mikil hjá notendum og þá sérstaklega leikjaunnendum sem bíða óþreyjufullir eftir nýjum leikjum sem nýta sér afl og getu A5X örgjörvans og grafíkkortsins, og Retina upplausnina sem nýi iPad hefur uppá að bjóða. Ekki skaðar að geta notað Apple TV með 1080p og spila þráðlaust í sjónvarpið í mögnuðum gæðum!

Til fróðleiks er hér nærmynd af iPad 2 og nýja iPad (frá The Verge) – smelltu á myndina til að stækka

Skrifað í flokkinn: Hugleiðingar, iPad
Skrifa athugasemd

Hönnun, áræði og framtíðarsýn

9. apríl 2010 | Palli Svans | Senda á Facebook

Sala á snjallsímum er nú orðin jafn mikil og á ferðatölvum í heiminum og er gert ráð fyrir því að á árinu 2012 fari hún framúr samanlagðri sölu á heimilis- og ferðatölvum. Nýtt tímabil er hafið í tölvuheiminum, tæknin ferðast nú með þér í sífellt smærri og meðfærilegri vélbúnaði.

Snjallsímar og smátölvur eins og Apple iPad eru dæmi um þá þróun sem þegar hefur átt sér stað. Og það má segja að Apple-fyrirtækið hafi frá upphafi verið leiðandi í þessari þróun, fyrst með tilkomu iPod-spilarans árið 2001, síðan með iPhone árið 2007 og nú með iPad.
Það forskot sem fyrirtækið hefur haft á aðra tölvu- og vélbúnaðarframleiðendur hefur nýst því vel. Vélbúnaðarrisar eins og Hewlett Packard virðast ekki getað fótað sig á þessum markaði og markaðsgreinendur telja að mörg fyrirtæki í þessum geira séu að missa af lestinni.

Brautryðjandi
En hvað er það sem gerir Apple frábugðið öðrum fyrirtækjum í tölvuheiminum? Það fyrsta sem kemur upp í hugann er samhæfing vélbúnaðar við hugbúnað en Apple er einstakt að því leyti að fyrirtækið hefur frá fyrstu tíð verið bæði vél- og hugbúnaðarframleiðandi. Ef við horfum til baka kemur í ljós að það var Apple sem átti stærstan þátt í þróun gluggakerfisins, notendaviðmótsins sem við búum að enn þann dag í dag og Microsoft tók síðan upp. Það var líka Apple sem gerði músina að ómissandi fylgihlut heimilistölvunnar (1983). En það er einnig staðfesta og áræði sem kemur upp í hugann þegar Apple á í hlut, það voru til dæmis ófáar efasemdarraddirnar sem heyrðust þegar hinn fyrsti iPod leit dagsins ljós.

Framtíðarsýn
Það er fyrst og fremst framtíðarsýn Steve Jobs, stofnanda og framkvæmdastjóra Apple, sem hefur gert vörur fyrirtækisins eins vinsælar og raun ber vitni. Jobs hefur þann einstæða hæfileika að skynja hvað almenningur vill áður en almenningur gerir sér grein fyrir því sjálfur. Jobs hefur einnig lag á því að ráða starfsmenn sem einnig eru brautryðjendur á sínu sviði. Þar má fremstan í flokki nefna Bretann Jonathan Ive, sem hefur gegnt stöðu yfirmanns iðnhönnunarsviðs Apple (Industrial Design) frá árinu 1997.

Jonathan Ive
Ive er samofinn þeirri velgengni sem fyrirtækið hefur átt að fagna en hann er aðalhönnuður iMac, Powerbook, Macbook, iPod, Iphone og iPad. Hann hefur síðustu árin safnað á hilluna nánast öllum hönnunarverðlaunum sem veitt eru vestanhafs og tvisvar verið útnefndur „Áhrifamesti Bretinn í Bandaríkjunum”, fyrst árið 2005 af The Sunday Times og síðan árið 2008 af Daily Telegraph. Það er ekki að undra því hönnun hans ber daglega fyrir augu okkar í sjónvarpsþáttum og kvikmyndum. Þessi hægláti fyrrum Lundúnabúi, sem er nánast óþekktur meðal almennings, hefur með samstarfi sínu við Steve Jobs orðið einn helsti áhrifavaldurinn á sviði iðnhönnunar síðastliðinn áratug.

Skrifað í flokkinn: Apple, Hugleiðingar
Skrifa athugasemd

Tölvuúrgangur endar í Afríku

17. maí 2008 | Palli Svans | Senda á Facebook

africa.jpg

Hvern dag berast þúsundir ónýtra tölva frá Vesturlöndum til hafna Vestur-Afríku þar sem þær enda á tröllauknum haugum vestræns tölvuúrgangs. Hvern dag stíga reykjarsúlur upp hér og þar um haugana, ástæðan er sú að börn og fullorðnir eru farin að byggja lífsviðurværi sitt á því að ná málmum úr tölvunum með því að brenna og rífa þær í sundur. Mörg lífshættuleg efni er að finna í úrganginum og reykjarkófið sem líður um haugana er baneitrað.

Þrátt fyrir skýr brot á alþjóðalögum er talið að sorpkaupmenn flytji milljónir tonna af tölvuúrgangi til Nígeríu og Ghana undir því yfirskini að um sé að ræða starfhæfar tölvur til notkunar í skólum og á sjúkrahúsum. Þannig sleppa þeir við ýmsar álögur og tolla en afleiðingin er orðin víðtækt heilsuvandamál meðal íbúanna, kvikasilfurs- og blýeitranir eru algengasta einkennið hjá þeim sem stunda haugana en aðra eitraða og hættulega málma og efni er einnig að finna í úrganginum.

Gullnáma eða hættulegur efnaúrgangur
Úr einu tonni af tölvuúrgangi má ná meira gulli en úr einu tonni af grjóti hefðbundinnar gullnámu. Íbúar hafnarborga Vestur-Afríku nýta líka úrganginn sem gullnámu og gera sér varla grein fyrir að vinnustaður þeirra er í raun réttu haugur af hættulegum efnaúrgangi.
Evrópusambandið hefur kveðið skýrt á um að öllum tölvubúnaði sem kom á markað eftir ágúst 2005 fylgi ákveðin ábyrgð framleiðanda, söluaðila og innflutningsaðila. Þeirra er ábyrgðin á því að eyða eða endurvinna tölvubúnaðinn samkvæmt reglum um efnaúrgang þegar notandinn losar sig við hann.

Það vekur því upp áleitnar spurningar þegar milljónir tonna hættulegs efnaúrgangs daga uppi í Vestur-Afríku undir yfirskini mannúðar og hjálparstarfs.
75 prósent umhverfisspjalla hverrar tölvu verða til áður en kveikt er henni í fyrsta skipti. Þau efni sem notuð eru við framleiðsluna eru sum hver eitruð eða framleiðsla þeirra mengandi fyrir umhverfið.
Framleiðendur hafa hinsvegar ekki sýnt mikla viðleitni til að þróa tölvur sínar með tilliti til umhverfisins, finna skaðlaus efni í stað þeirra eitruðu eða bæta þann umhverfisskaða sem verksmiðjur þeirra valda. Ábyrgðarleysið er þó mest þegar líftíma tölvunnar lýkur, eyðing tölvubúnaðar er kostnaðarsamur ferill og kannski er þar komin ástæða fyrir losunarstöðum á vesturströnd Afríku.

Skrifað í flokkinn: Annað, Hugleiðingar
4 athugasemdir / Skrifa athugasemd

Sýndarkynskipti algeng meðal beggja kynja

6. apríl 2008 | Palli Svans | Senda á Facebook

wow.jpg

Könnun sem Nottingham Trent háskólinn í Bretlandi gerði meðal einstaklinga sem spila leiki á netinu hefur leitt í ljós að meirihluti þeirra skiptir um kyn þegar leikið er. 125 einstaklingar sem spila tölvuleiki á netinu tóku þátt í rannsókninni og kom í ljós að konur voru mun líklegri til að skipta um kyn en karlar.

Allt að 70 prósent kvenna sögðu að þær kysu frekar að nota sér karlhlutverk í netleikjum þar sem hægt er að búa til eigin persónu og velja kyn, uppruna og útlit. Ólíkar ástæður virðast þó liggja að baki þessu vali. Helstu ástæður kvenna virðast þó vera þær að þeim finnst karlpersónur njóta betri samskipta sín á milli auk þess sem kvenpersónur séu meira áreittar að óþörfu.

Þrátt fyrir að færri karlmenn viðurkenndu kynskipti en konur leiddi rannsóknin í ljós að einnig meðal þeirra er það meirihlutinn sem stundar þessa iðju í netleikjum. Um 54 prósent karlanna viðurkenndu að hafa komið fram sem konur, til að daðra við aðra leikendur og uppgötva óþekktar hliðar á eigin persónuleika.

Aðrir þættir þessarar rannsóknar tóku á ástæðum þess að fólk stundar netleiki en um 40 prósent sögðu að það væri til að flýja erfiðar aðstæður heima fyrir eða í vinnu og einn af hverjum fimm sagðist eiga auðveldara með samskipti við annað fólk í netleikjum en í raunverulegum samskiptum.

Þrátt fyrir að netleikir hafi fyrst komið til sögunnar uppúr 1980 er það ekki fyrr en nú sem bylting hefur orðið með tilkomu ljósleiðara- og breiðbandstenginga. Sýndarveruleiki í þrívídd hefur þannig rutt sér braut inná netið við ótrúlegar vinsældir almennings. Til dæmis eru fastir áskrifendur World of Warcraft orðnir um tíu milljónir í dag og koma frá öllum heimshornum.

Í þessu umhverfi er hægt að stjórna kyni, uppruna og jafnvel tegund. Fólki finnst áhugavert og skemmtilegt að breyta hinum og þessum einkennum sinnar persónu til að skoða hvaða áhrif það hefur á aðra. Sýndarheimurinn er ekki háður þeim mörkum sem okkur eru sett í daglegu lífi og sífellt fleiri fá áhuga á því að kanna þær hliðar persónu sinnar sem annars væri ekki hægt í daglegu lífi.

Skrifað í flokkinn: Hugleiðingar, Leikir
3 athugasemdir / Skrifa athugasemd

Órólegur? Reiður? Kemst ekki á netið?

5. apríl 2008 | Palli Svans | Senda á Facebook

reidur.jpg

Við og við lesum við fréttir þar sem lögregla hefur verið kölluð til vegna alvarlegs ósættis innan heimilis varðandi net- og tölvunotkun. Og við hristum höfuðið í vandlætingu meðan við veltum því fyrir okkur hvernig ungdómurinn í dag sé eiginlega uppalinn. En vandamálið ristir dýpra og er ekki bundið eingöngu við yngri kynslóðina. Netfíkn er orðinn viðurkenndur sjúkdómur innan heilbrigðisgeirans og reyndar það algengur að læknar ræða um að það eigi að bæta honum við í greiningarskrá yfir helstu geðsjúkdóma. Nýlega birtist grein í hinu virta tímariti American Journal of Psychiatry um netfíkn sem er skilgreind sem áráttu- og hvatvísiröskun (compulsive/impulsive disorder). Þar eru taldir upp fjórir helstu grunnþættir netfíknar:

Óhófleg notkun. Einstaklingurinn veit ekki hvað tímanum líður og vanrækir eigin grunnþarfir og nánasta umhverfis.

Félagsfælni. Reiði, óróleiki og/eða þunglyndi þegar ekki er hægt að komast í tölvuna.

Sífelld þörf fyrir öflugri tölvu, hugbúnað og aukinn tíma við tölvuna.

Neikvæðar afleiðingar, þ.m.t. rifrildi, lygar, slæleg frammistaða á öðrum sviðum og síþreyta.

Greinin beinir helst sjónum að Suður-Kóreu en þar í landi er hvað víðtækust notkun almennings á háhraðanetum í heiminum. Þar koma líka í ljós alvarlegustu afleiðingar netfíknar, blóðtappar vegna hreyfingarleysis og jafnvel morð vegna netleikja. Yfirvöld hafa skilgreint netfíkn sem eitt af alvarlegri lýðheilsuvandamálum þar í landi en um 210 þúsund einstaklingar eru nú taldir þjást af þessum sjúkdómi og eru í bráðri þörf fyrir meðferð, hvort sem er með lyfjum eða innan spítala.
Og framtíðin er ekki björt, hver framhaldsskólanemi í Suður-Kóreu eyðir að meðaltali 23 klukkustundum við netleiki á viku og gert er ráð fyrir því að innan tíðar bætist við rúmlega milljón einstaklingar sem þurfi á grunnmeðferð að halda. Það hefur einnig valdið áhyggjum að fjöldi þeirra sem hætta í skóla eða vinnu til að eyða meiri tíma við tölvuna hefur aukist. Kínversk stjórnvöld greina frá því að 13,7 prósent fullorðinna netnotenda sé hægt að skilgreina sem netfíkla. Það eru heilar tíu milljónir manna.

Facebook eða World of Warcraft?
Þrátt fyrir að netfíklar leiti ætíð í sameiginlegan brunn fíknarinnar, klám, leiki, veðmál og spjallforrit, virðist vera grundvallarmunur á Asíu og Vesturlöndum. Í Kóreu eru netfíklar nær eingöngu að spila netleiki á meðan Bandaríkjamenn liggja marflatir fyrir samskiptasíðum eins og Facebook.
Í Bandaríkjunum og á Vesturlöndum er erfiðara að fá tölulegar upplýsingar um hugsanlega netfíkla þar sem notkunin fer mestmegnis fram innan heimila en ekki á netkaffistöðum (internet cafes) eins og tíðkast í Asíu. Þó má ætla að þróunin sé svipuð. Og því miður er meðferð við netfíkn mjög erfið, áhættusöm og hætt við því að fíkillinn falli aftur í sama gamla farið. Notandinn myndar sterkt samband við tölvuna, jafnvel eins og um maka væri að ræða. Eðlilegri tilfinningaútrás er ekki lengur veittur farvegur meðal fólks í daglegu lífi heldur með spjallforritum, netklámi og tölvuleikjum. Og tölvan er orðin fyrirbæri sem viðkomandi eyðir mestum tíma lífs síns með, þegar það samband er rofið er það eins og að missa besta vin sinn. Og afleiðingin er þunglyndi eða reiði.

Skrifað í flokkinn: Hugleiðingar
4 athugasemdir / Skrifa athugasemd

MPIO hönnun ansi kunnugleg við fyrstu sýn

1. febrúar 2008 | Palli Svans | Senda á Facebook

mpio.jpgMPIO-fyrirtækið framleiðir að stórum hluta mp3-spilara og eru afurðir þess töluvert vinsælar á Asíumarkaði þar sem þær eru ódýrari en þekktari merki. Fyrirtækið kynnti nú nýverið nýjan spilara MPIO-MG200 en tækið spilar tónlist, kvikmyndir og er með innbyggt útvarp.

Við fyrstu sýn er greinilegt að iPod og iPhone eru helstu fyrirmyndir varðandi útlit gripsins. Hægt er að fá MG200 í þremur stærðum af flash-minni: eins, tveggja og fjögurra gígabæta og viðmiðunarverð eru um 4500, 5700 og 7500 krónur erlendis.

http://www.mpio.com/

Skrifað í flokkinn: Hugleiðingar
6 athugasemdir / Skrifa athugasemd

MacBook Air – viðbrögð notenda, verð og notagildi

16. janúar 2008 | Bjöggi | Senda á Facebook

macbook_air2.jpg

Apple hefur vægast sagt hrist fartölvumarkaðinn til með látum eftir að MacBook Air var kynnt í gær.

Miklar væntingar voru gerðar til Keynote af hálfu notenda (að vana) – og viðbrögðin voru mismunandi hjá mönnum. Margir ánægðir og aðrir ósáttir með að Apple kynnti ekki tíu vörur í einu.

Þetta var samt sem áður ágæt sprengja og verð ég að tjá mig örlítið um viðbrögð makkaheimsins. Margir urðu svekktir yfir örgjörva, harða disk og skorti á FireWire-tengi. Öðrum fannst verðið allt of hátt.
features_open_air20080115.png

En ef við lítum aðeins á staðreyndir – ef tölvan væri með auka tengi, þá yrði hún að vera örlítið þykkari. Ef hún væri með stærri disk, þá væri hún einnig örlítið stærri um sig (eða dýrari, fer eftir rúmmáli disks).

Þetta er þynnsta fartölva í heimi og það er nákvæmlega það sem Apple vildi búa til. Einhverju verður að fórna og einnig líta á markaðinn í heild sinni, hvað almúginn vill og þarf á að halda.

features_intel20080115.jpgVerðið er einnig góður punktur. Af hverju svona dýrt? Þetta er jú bara 1,6GHz Core 2 Duo, 80GB 4200 rpm diskur með engu geisladrifi!

Nei, þetta er ekki „bara“ það. Þetta er ultra-portable og sú þynnsta á markaðinum. Vinna og þróunarkostnaður á bakvið þessa vöru er líklega á mjög háu stigi og tiltölulega lág framlegð á henni.

The company’s design team went through roughly 100 design prototypes to find the right form. -Steve Jobs

64GB SSD á $999, eru þeir brjálaðir? Nei, kíkið á markaðsverð 64GB SSD korta – þið finnið það varla undir $1400. En af hverju er Appe að bjóða upp á þetta? Tvær ástæður; 1) ef þú átt pening og vilt meiri hraða 2) lækka markaðsverð á flash-drifum.

Hverjir vilja kaupa þessa tölvu? Það er einfalt. Nánast allir almennir notendur, kaupsýslumenn, ferðalangar og skólafólk. Af hverju? Því það notar flest allt tölvuna í einfalda hluti á borð við; netið, ritvinnslu, skoða vídeó og ljósmyndir, hlusta á tónlist og aðra létta vinnslu.

Hvað með kostnað? MacBook er, sem betur fer, ennþá til í vörulínu Apple og er á mjög góðu verði. Hún hentar einmitt þeim sem vilja ódýra og góða tölvu. Það er enginn að neyða mann til að kaupa MacBook Air :)

—

Ef við förum þá aðeins út í aðra sálma og vitnum í Jón Helga, Macworld-unnanda og Maclantic-verja, þá hefur hann nokkuð margt að segja um sína upplifun á MacBook Air:

Þetta er ótrúlega svöl tölva. Hún er náttúrulega fáránlega létt og þunn en það kom mér á óvart hvað footprintið á henni er stórt, mér fannst það bara svipað og á MacBook.

Við vorum að spjalla við gaur sem er búinn að vera að leika sér með svona tölvu í nokkrar vikur og hann sagði að það munaði mjög miklu í hraða á SSD og HD. Og það væri mesti munurinn í því að allt væri svona snappier, þ.e. þegar maður opnar forrit, glugga, eða eitthvað þ.h.

Þessir multitouch gestures eru líka mjög kúl. Það virkar mjög vel í Preview og iPhoto en svo verður spennandi að sjá hvað aðrir developerar gera í þessu og nota þetta.

Svo eru svona smá hlutir eins og þeir koma fyrir IR receiver framaná henni þó hún sé mjög þunn þar og líka svona lunga (hvítt ljós sem “andar”) Annað sem er ótrúlega sniðugt er að það er gúmmípúði, tæplega 1 mm allan hringinn í kringum skjáinn þannig að þegar maður lokar tölvunni þá er hún rykþétt (svona upp að vissu marki amk.) og þá virkar hún líka mjög solid þegar maður lokar henni, óháð því hvar maður ýtir í skjáinn.

Lesið innlegg hans í heild sinni á Maclantic spjallinu.

Skrifað í flokkinn: Hugleiðingar, MacBook Air
25 athugasemdir / Skrifa athugasemd

MacBook touch?

30. nóvember 2007 | Bjöggi | Senda á Facebook

macbook_touch_453.jpg

Eftir að iPhone kom út hefur tækjaheimurinn allsvakalega breyst hvað varðar framtíðarhorf ferðatækja á borð við gemsa og lófatölvur. Apple útbjó iPhone með einum fullkomnasta snertiskjá sem fyrirfinnst og í kjölfarið hafa margir velt fyrir sér hvernig Apple myndi nýta sér það á annan máta en gert er í dag.

Það augljósasta, að mínu mati, væri að sjálfsögðu að búa til s.k. „ultra-portable“ tölvu sem væri örþunn, með 10-13″ snertiskjá og að sjálfsögðu með þráðlaust netsamband við bæði net og jaðartæki (þráðlaust lyklaborð og mús).

Hvað segið þið? $1299 MacBook touch á Macworld í janúar? Slef..

Mynd fengin frá Gizmodo.

Skrifað í flokkinn: Fartölvur, Hugleiðingar, Orðrómur
13 athugasemdir / Skrifa athugasemd

Breytingar framundan?

30. ágúst 2007 | Steinar | Senda á Facebook

Geimur01.jpg

Eins og flestir lesendur vita, er Apple líklegast það fyrirtæki í raftækjabransanum sem hefur ströngustu reglubókina þegar kemur að útliti. Skipperinn sjálfur, Steve Jobs, í samvinnu við hæft starfsteymi hefur náð færa okkur raftæki sem eru viðkunnalegri og þægilegri í notkun en flest önnur. Hvaða öðru fyrirtæki hefði t.d. dottið í hug að setja svefnljós á tölvur sem virkar sem ljúfur andardráttur sofandi manneskju?

Ef litið er á hönnun raftækja Apple má greinilega skipta síðari árum (1997-2007) í tvö tímabil. Það fyrra hefst með skipun Jonathan Ive sem yfirhönnuðs og til að byrja með var sótt innblástur í nammi sem birtist m.a. í gómsætri plasthúð – ýmist yfir björtum litum eða grátónum.

Árið 2001 var þó u-beygja tekin í hönnun og nýtt tímabil hefst. Þar er kynntur hvíti liturinn með iBook og 1. kynslóð af iPod. Síðar bættust við lampa-iMac, hvít mús, lyklaborð, o.fl. Álið kemur síðar sterkt inn sem hliðartónn hvíta litsins – meira ríkjandi í Pro búnaði en minna í Consumer búnaði.

Þá erum við komin til ársins 2007 og enn ríkir hvíti liturinn yfir meginhluta vöruúrvalsins. Þegar litið er til baka má sjá að nokkur einkenni eru sterkari en önnur – m.a. að Apple er minimalískt í litavali (meira segja í sinni litríkustu tíð var ekki notast við fleiri en tvo áberandi/ríkjandi liti í einni vöru).

Það má auðvitað ganga mun lengra í stúderingu á vöruúrvali Apple en í grófri yfirferð má þó vel sjá eitt ákveðið atriði; hófstilling í litum og áferðum. Ef við setjum það í samhengi við ýmislegt sem hefur verið að gerast er hægt að spá í framtíð Apple.

Það hafa allir tekið eftir útliti iPhone og flestir einnig séð nýja iMac en þó hafa fáir hugsað út í útlit þessara nýju vara í samhengi við vöruúrval Apple. Flestir sjá jú bara viðbót við „ál-lúkkið“ en í raun er margt sem bendir til að þessar vörur séu að leiða okkur inn í nýtt tímabil.
iPhone litir og áferðir
Í iPhone má finna eftirfarandi liti og áferðir:

  1. Króm
  2. Svartur háglans
  3. Ál
  4. Svartur matt
  5. Hvítur (letur og dock)

iMac litir og áferðir
Í iMac má finna:

  1. Svartur háglans
  2. Svartur matt
  3. Ál
  4. Hvítur (lyklaborð, mús, fjarstýring)

Það má sem sagt finna marga liti/áferðir í nýjustu vörum Apple sem verður að teljast u-beygja – og þegar Apple tekur slíka beygju telst það vera byrjun á nýju tímabili. Það sést augljóslega þegar horft er til baka en Apple gerir sjaldan eina eða tvær vörur sem „eru bara öðruvísi“.

Með þetta í huga eru góðar líkur á að komandi vörur frá Apple falli í sama útlit – sérstaklega consumer vörurnar (t.d. Mac Mini, Apple TV og MacBook) og er alls ekki ólíklegt að Pro vörur (t.d. Mac Pro og MacBook Pro) fái nýjan svip; álið sett til hliðar eða í minni pokann fyrir annarri (nýrri?) áferð. Eða hvað?

5. september verður kynning hjá Apple. Hvað mun gerast þá? Munu iPod Nano og/eða hinn nýji iPod (Touch?) fá til sín útlitseinkenni iPhone og iMac? Ef svo verður, þá hefur hið nýja tímabil verið nokkuð vel staðfest.

iPod Touch?

*Teiknuð mynd (iPod Touch?)

Skrifað í flokkinn: Hugleiðingar, Orðrómur
7 athugasemdir / Skrifa athugasemd

Enginn iPhone hérlendis?

26. júní 2007 | Bjöggi | Senda á Facebook

iTunes-Flags.jpg

Það má gera sér hugmyndir um að iPhone verði einungis fáanlegur í þeim löndum þar sem iTunes Store fyrirfinnst eftir að hafa heyrt nýjustu fregnir um hvernig iPhone mun virka í Bandaríkjunum.

Nýjasta iPhone kennslumyndband frá Apple sýnir hvernig skal virkja símann og er það einungis hægt með því að skrá sig á iTunes Store. Þar er krafist að einstaklingur gefi upp persónupplýsingar á borð við kennitölu (eða Social Security Number), ásamt heimilisfangi og greiðsluleið (t.d. VISA eða Mastercard).

Erfitt verður að komast hjá þessu ef sama aðferð verður notuð í Evrópu, nema viðkomandi eigi kreditkort í einhverju að ofangreindu löndum og vilji hafa erlent númer og þar af leiðandi mjög há gjöld til að nota símann.

Segjum sem svo að iPhone verði bundinn við eitt eða tvö símafyrirtæki í Evrópu. Þar mun Vodafone og O2 koma sterklega til greina og þá hefði Ísland góðan möguleika að fá iPhone.. en EF Apple mun fara sömu leið og í USA (þ.e. að virkja símann í gegnum iTunes Store) þá er Ísland úr sögunni.

Möguleiki væri að iTunes Store kæmi til Íslands og þá væri fyrrnefnda vandamál horfið, en líkurnar á að það gerist eru afar litlar.

Eina von okkar landa væri þá að hægt verði að kaupa iPhone ólæstan og án bindingar við nokkuð símafyrirtæki. Það myndi að sjálfsögðu þýða hærra verð, en allavega nothæfur sími hérlendis..

Skrifað í flokkinn: Hugleiðingar, iPhone
27 athugasemdir / Skrifa athugasemd

« Eldri fréttir

Auglýsingar

Við spyrjum

Ætlarðu að fá þér nýja iPad?

Sjá niðurstöður

Loading ... Loading ...

Fréttaflokkar Maclantic

Auglýsingar

Maclantic á Facebook

Kommentið á Epic Games:

(Um nýja iPad) This new device has more memory and higher screen resolution than an Xbox 360 or PS3.

Joy of Tech

Nýjasta Joy of Tech!