Almenningur í Bretlandi og Bandaríkjunum virðist litlu ráða um ákvarðanir stjórnvalda þegar kemur að löggjöf um fjarskipti og hagsmuni hins hefðbundna notanda á netinu.
Í vikunni sem leið mátti sjá ýmsar athyglisverðar fyrirsagnir á vefmiðlum vestanhafs. „The Day the Internet Lost”, mátti lesa á einni af stærri síðunum og The New York Times hélt sérstaka Internet-minningarathöfn í tilefni þess að samkvæmt dómsúrskurði sem féll á þriðjudag er fjarskipta- og netþjónustufyrirtækjum vestanhafs nú heimilt að loka á eða draga verulega úr hraða ákveðinna vefsíðna og krefjast þess í framhaldi að eigendur vefjanna greiði sérstakt gjald sem tryggi eðlilegan hraða og aðgengi notenda að efni þeirra. Úrskurðurinn gerir nú stórfyrirtækjum á fjarskiptamarkaði löglega kleift að stýra umferð á hluta netsins með þvingunum og vekur upp spurningar varðandi framtíð netheima og þau lýðræðislegu vinnubrögð sem við viljum að séu viðhöfð þar sem annars staðar.
Fjarskiptastofnun missir valdið
Dómsúrskurðurinn á þriðjudag fellir úr gildi það vald sem Fjarskiptastofnun Bandaríkjanna (Federal Communications Commission) hefur haft til að tryggja hagkvæma, örugga og aðgengilega fjarskiptaþjónustu og vernda hagsmuni og réttindi almennings á netinu. Þriðjungur Bandaríkjamanna hefur sem dæmi í dag ekkert aðgengi að háhraðanetum en það var einmitt eitt af markmiðum stofnunarinnar að stoppa í það gat. Með úrskurðinum hefur boltanum nú verið velt til fyrirtækja eins og AT&T, Comcast, Verizon og Time Warner Cable sem hingað til hafa sýnt lítinn sem engan áhuga á að byggja upp hagkvæm háhraða-dreifikerfi sem ná til allra landsmanna.
Villta vestrið
Ákvörðun dómstóla hefur vakið upp hörð viðbrögð vestanhafs og er talað um afturhvarf frá lýðræði því hagsmunir stórfyrirtækja hafi nú meira vægi en hagsmunir og réttindi almennings.
Hið virta blað The Economist fjallaði um málið í vikunni og tók sem dæmi að netþjónustuaðilar gætu nú fyrirvaralaust stýrt umferð af leitarvefjum eins og Google að eigin leitarsíðu og þannig hagnast verulega vegna aukinnar umferðar. Það er í raun eins og einhver utanaðkomandi skipti um rás meðan þú horfir á sjónvarpið án þess að þú fáir nokkru um ráðið. Breytingarnar sem nú eru að verða að veruleika eru hinsvegar nánast ósýnilegar hinum hefðbundna notanda og þess vegna hættulegar í eðli sínu. Lögmál hins Villta vesturs ræður nú ríkjum, hagnaður stórfyrirtækja á fjarskiptamarkaði allsráðandi á kostnað þess jafnræðis sem netið á að veita háum sem lágum.
Keyra frumvarp í gegn
Bretar eru einnig að taka örlagaríkt skref í netmálum. Hið umdeilda frumvarp bresku ríkisstjórnarinnar (Digital Economy Bill) sem lýtur að höfundarrétti og aðgerðir gegn ólöglegu niðurhali hlaut meirihluta atkvæða í annarri umræðu á breska þinginu á miðvikudag. Frumvarpið á þá aðeins eftir að fara í gegnum Lávarðadeildina en þar er talið nær fullvíst að það verði samþykkt og verði því að lögum innan tíðar. Kosningar eru þó handan við hornið og óvíst hvað ný ríkisstjórn tekur til bragðs varðandi jafn umdeilda lagasetningu.
Wikileaks lokað?
Frumvarpið gerir samtökum og eigendum höfundaréttar kleift gegn dómsúrskurði að fá aðgang að nöfnum og heimilisföngum þeirra sem tengdir eru við ólöglegt niðurhal og hefja lögsókn gegn þeim. Það sem mesta athygli hefur þó vakið í frumvarpinu er klausa sem veitir viðskiptaráðherra heimild til að fyrirskipa lokun á vefsíðum sem; „…hafa verið, eru, eða eru líklegar til að vera notaðar við athæfi sem varða brot á lögum um höfundarrétt eða hafa tengsl við slíkt athæfi.”
Ríkisstjórninni væri því í lófa lagið að fyrirskipa lokun á síðum eins og Wikileaks sem birta skjöl sem eru í nær öllum tilfellum varin höfundarrétti eða leynd. Orðalag frumvarpsins um síður sem eru „líklegar til að vera notaðar” hefur líka vakið sterk viðbrögð og óvissu um hvaða völd ríkisstjórnir eru að fá í hendurnar sem geti ógnað lýðræði og ritfrelsi.
Sterk meðöl en engin breyting
Það sem er umhugsunarvert varðandi frumvarp bresku stjórnarinnar er hið sterka meðal sem á helga tilganginn. Svíar settu lög um ólöglegt niðurhal í apríl á síðasta ári og netumferð í landinu dróst saman um 30 prósent á skömmum tíma. Áður en lögin tóku gildi var Svíþjóð í hugum margra gósenland ólöglegs niðurhals og heimili The Pirate Bay, einnar stærstu deilisíðu á ólöglegu efni í heiminum. En aðeins fáum mánuðum eftir að lögin voru sett hafði netumferð og ólöglegt niðurhal í landinu aukist á nýjan leik og hefur aldrei verið meir en nú. Ástæðan er einfaldlega sú að þeir sem eru að sækja ólöglega kvikmyndir, sjónvarpsþætti og tónlist nýta sér nú dulkóðun til að fela innihald þeirra skráa sem sóttar eru og nýta sér aðrar leiðir sem fela slóð þeirra og uppruna. Ástandið sem lögunum var gert að fyrirbyggja er því óbreytt og lögin því tilgangslaus.
Loading ...
The Apple iPad. The name is a killing word -- more than a product -- it's a statement, an idea, and potentially a prime mover in the world of consumer electronics.
