Íslenska leikjafyrirtækið Dexoris hefur gefið út tónlistarleikinn Audio Puzzle fyrir iPhone og iPod Touch en leikurinn á engan sinn líkan í heiminum. Hann er sá fyrsti í netverslun Apple sem breytir tónlist leikmanna í púsluspil með því að nota lög sem efnivið í púsluspilið í stað mynda. Ólíkt öðrum tónlistarleikjum, þá sækir Audio Puzzle lögin úr tónlistarsafni leikmanna og því þarf ekki að kaupa tónlistina sérstaklega. Það má því segja að Audio Puzzle sé hið eina sanna púsluspil tónlistaráhugamannsins og bylting fyrir púsláhugamenn um allan heim.

“Það er skemmtilegt að velja uppáhaldslögin sín og láta leikinn breyta þeim í púsl en þó hef ég meira gaman að því að láta Audio Puzzle velja lögin fyrir mig.” segir Ólafur Viggósson framkvæmdastjóri Dexoris. “Þannig enduruppgötva ég gamla og góða slagara sem höfðu gleymst í tónlistarsafninu mínu.” Ennfremur finnst honum sem hann þjálfist í hlustun við spilun leiksins og leikurinn hafi því áhrif á það hvernig hann skynjar tónlist. “Mér finnst ég þekkja lögin betur og stundum lendi ég í því að heyra í nýjum hljóðfærum og laglínum.”

Gagnrýnendur eru sammála um það að Audio Puzzle sé skyldueign fyrir alla eigendur iPhone eða iPod touch enda einstakur og vandaður leikur. Dexoris hlaut styrk frá Átaki til atvinnusköpunar til áframhaldandi þróunar á leiknum svo búast má við meiri tónlistarupplifun frá þeim á vormánuðum.

Leikjafyrirtækið Dexoris hafði áður gefið út leikinn Peter und Vlad, æsispennandi ævintýraleik fyrir alla fjölskylduna sem fjallar um Sedov-bræðurna, smalann Pétur og uppfinningamanninn Valda, og baráttu þeirra við stjórnlausa uppfinningu. Leikurinn fékk góðar viðtökur en fleiri en 40 þúsund notendur hafa sótt leikinn frá upphafi og í október valdi Apple leikinn inn á listann What’s Hot í netverslun sinni.

Báðir leikirnir fást í Apple iTunes Store:

Audio Puzzle: http://www.audiopuzzle.com/buy-audiopuzzle/
Peter und Vlad: http://www.peter-und-vlad.com/buy-peterundvlad

Skrifað í flokkinn: App Store, Leikir
Skrifa athugasemd